Zencefil ve limon koronavirustan qorumay, bunı ekimler bütün dünyada ayta. Ekimlerniñ aytqanlarına baqmadan, Qırımda bu mallarnıñ fiyatı arta. Artıq yarımadada zencefil ve limonnı er kes alıp olamay.
Aqyarnıñ Merkeziy bazarında karantin daa ilân etilmegende satıcılar fiyatlar artqanı içün olarnı sıq-sıq deñiştirmege mecbur edi. Peştahtada bir kilogramm portaqal 85 rubleden (30 ğrıvnâ – QA), pomelo – 150 ruble (54 ğrıvnâ – QA), limonlar dört qat paalılaştı – 480 ruble (172 ğrıvnâ – QA) oldı. Ticaret noqtalarından birinde ilân asılğan: «Bir insanğa eñ çoq bir kilogramm limon berilecek».
«Türk limonı – bir kilo içün 500 ruble (tahminen 180 ğrıvnâ – QA), özbek limonı ise – biñ ruble (tahminen 360 ğrıvnâ – QA). Zencefil – bir kilo 7 biñ (tahminen 2,5 biñ ğrıvnâ – QA), 700 ruble (250 ğrıvnâ – QA) – 100 gramm», – dep ayta satıcı.
Amma zencefil bu fiyatta bile er peştahtada yoq.
Bağçasaraydaki supermarket rafları tolu, amma alacaq kişi yoq. Olar evde oturıp para masraf etmeyler, dep ayta yerli sakinler.
«Kün-künden fiyatlar arta, karantin ise devam ete. İnsanlar çalışıp olamay, para qazanıp olamay ve, elbette, özüne azıq mallarını bile alıp olamay», – dep tarif etti Bağçasaray sakini.
Yerli bazarda satıcılar sarımsaq ve limonlarnı peştahtalarğa fiyatsız qoyıp başladı. Müşterilerni qorquzmağa istemey ekenler. Keçken afta bir kilogramm sarımsaq ve limon fiyatı 450 rublege qadar arttı (tahminen 160 ğrıvnâ – QA). Zencefilni satın alğan satıcılar çoq degil, müşterilerge pek paalı kele, deyler.
«Koronavirustan soñ fiyatı pek arttı, fiyatnı pek arttırdılar. Zencefil – 7 biñ ruble (tahminen 2,5 biñ ğrıvnâ – QA). Men 500-den (tahminen 180 ğrıvnâ – QA) aldım, ertesi künü ise 900 oldı (tahminen 320 ğrıvnâ – QA), soñra baqsam – 3 biñ (tahminen 1700 ğrıvnâ – QA), soñra – 7 biñ. «Amma da fiyat!» dedim. İnsanlar deli kibi bu zencefilni alalar: parça-parça çayğa koyalar, til astına», – dep tarif etti satıcı Qırım.Aqiqatqa.
İspaniyada rus tilli ekim Oksana Fomina yañı koronavirustan profilaktika ve halq tedaviylevi yoq, dep hatırlata.
«Bir afta immunitetni küçlendirecek ve virustan qoruycaq zencefil çayı, island yosunı, tılsımlı bal ya da başqa bir şey yoq. Mücizeli ilâc, yaşlandırğan almaçıqlar, tılsımlı bir tayaqçıq yoq, sizni qoruycaq bir şey içmege ya da aşamağa imkân yoq», – dep ayta Oksana Fomina.
Qırımda paratsetamolnı da alalar, endi Qırım memurları da koronavirustan qorumağanını aytalar. Rusiye kontrolindeki Qırım yolbaşçısı Sergey Aksenov toplaşuvlardan birinde paratsetamol tek sıcaqnı tüşüre, dep hatırlattı. Qırımdaki Roszdravnadzor yolbaşçısı Vasiliy Klimov ise qırımlılarnı bu toqtatmay, dep cevap berdi: bir kişi 30-ar paket ala.
Qırımnıñ Rusiye akimiyeti kolbas, balıq, qartop, soğan ve ösümlik yağı paalılaşqanını qabul etti.
«Şimdi oraza tutamız, et fiyatları pek artmadı. Pasha ve mayıs bayramlarına yaqın et mallarınıñ fiyatı artacaqtır», – dep qayd etti Qırımnıñ Rusiye köy hocalığı naziri Andrey Rumşin.
Memurlarnıñ aytqanına köre, fiyatlarnı istisalcılar arttırdı: birisi ruble ucuzlaşqanı içün, birisi COVID-19 sebebinden olğan ajiotaj sebebinden. Qırımnıñ Rusiye ükümeti inkâr etmey: mal fiyatları artmağa devam etecek.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
