Qırımtatarlarnıñ statusı aqqında dünya munaqaşası Amerika Qoşma Ştatları ve Birleşken Milletler Teşkilâtında bunıñnen bağlı qararlarnıñ qabul etilmesinen yekünlene bile. Bunı Birleşken Milletler Teşkilâtınıñ tamır halqlar meselelerinden Daimiy forumınıñ prezident muavini Oliver Loode «Qırım – Ukrainadır. İşğal etilgen yarımada keçmiş ve kelecek arasında» halqara forumında bildirdi.
«Dünya toplulığı Qırım meselesi ve qırımtatarlarnıñ taqdirini pek müim körmey, amma tendentsiyalar mında müsbettir. Fevral 4-te Avropa parlayemnti Qırım ve qırımtatarlar aqqında rezolütsiyanı qabul etti, anda qırımtatarlar – tamır halqtır, dep aytıla», – dedi o.
«Mence, AQŞ kongressi böyle bir rezolütsiyanı qabul etse, yahşı olur edi. BMT baş kâtibi bunı raat-raat bildirir edi. Qırımtatarlar tamır halqmı kibi munaqaşalar biter edi. Rusiyeniñ aytqanları da müim olmaz edi – bu olarnıñ iç sesidir. Qırımtatarlarnıñ mevamı pekitilir edi», – dep qayd etti BMT tamır halqlar meselelerinden Daimiy forumınıñ prezident muavini.
Ukraina Yuqarı Radası 2014 senesi mart 20-de qırımtatar halqını tamır halq olaraq tanıp, 2007 senesi BMT tamır halqlarnıñ aq-uquqları deklaratsiyasına qoşuldı. 2014 senesi Qırımnıñ Rusiye yolbaşçısı Sergey Aksenov dedi ki, Qırımda yekâne tamır halq adlanmaq aqqı iç bir halqqa ait degil.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
