«Eurovision» yır yarışınıñ ukrain milliy saylavında ğalip çıqqan yırcı Jamala bildirdi ki, «1944» yırında siyasiy bir münderice yoq.
«Ne içün «1944», ne içün bu adını qoruyımmı? Bu bir tarihtır. Qorantamnıñ, Camaladinovlar sülâlesiniñ ayatını deñiştirgen bir yıl. Bütün sülâlemiz sürgünlikke oğradı», – dedi yırcı.
«Eurovision-2016» milliy saylavınıñ reberi Natalya Françuk yırnıñ siyasetnen bağlı olğanını red etti.
«Unutmañız, lütfen, «EBU» standart bir tedbir, yır din, küfür ve siyasiy çağıruvlar ceetinden teşkerile», – dep qoştı o.
Fevral 21-de olıp keçken «Eurovision-2016» yır yarışınıñ milliy saylavında Jamala «1944» yırınen ğalebe qazandı. O, seyircilerniñ eñ büyük baasını aldı – 6, jüri ise 5 baa berdi. Jüri azaları The Hardkiss taqımına 6 baa bergenler. Faqat, seyircilerniñ reyleri müim oldı.
Jamala 1944 senesi qırımtatar halqına qarşı yapılğan repressiyalar – sürgünlik mevzusına bağışlanğan «1944» yırınen çıqışta bulunacaq. «Eurovisionnıñ» yarı finalları mayıs 10-da ve 12-de keçirilecek, yarış finalı – 2016 senesi mayıs 14-de.
