Kreml nezareti altında olğan Qırım prokuraturasınıñ başı Natalya Poklonskaya Ukraina İçki işler naziri Arsen Avakovnı cinaiy taqip ile qorquza. Ukrainada Qırımnı qaytarmağa yardım etecek Milliy gvardiyanıñ yañı bölügi teşkil etilecegi aqqında aytqanını izaatlap bunı ayttı.
«Avakov bu kibi lafları ile Rusiye Federatsiyası Cinaiy kodeksiniñ maddesini qazana. Oña qarşı Ukrainada, bilgenime köre, toqtatılğan işler bar, Ukraina Baş prokuraturasında Avakovğa nisbeten açılğan işler bar, şimdi yañı maddelerni qazana, ğaliba», – dep bildire Poklonskanıñ sözlerini RİA Novosti Rusiye agentligi.
Onıñ sözlerine köre, silâlı bölükniñ teşkil etilmesi Rusiye CK «Qanunsız silâlı bölükniñ teşkil etilmesi ve onda iştirak» maddesi boyunca cezalana bile.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
