Qırımdaki Ukrain medeniyet merkeziniñ faalleri mart 8-de Rusiyede mahküm etilgen Ukraina vatandaşı Nadejda Savçenkoğa qoltutmaq içün birer-birer aktsiyalarğa çıqtılar.
Faaller Aqmescitniñ farqlı yerlerinde yolda «Free Savchenko» levhaları ile turıp, direklerge Savçenkonı azat etmek çağıruvlarını yapıştırdılar. Bunı isbatlağan fotoresimler içtimaiy ağlarda tarqatıldı.
Savçenkoğa qoltutuv aktsiyaları bütün dünyada keçirildi.
Mart 9-da Rusiye mahkemesinde Savçenko soñki sözüni ayttı. Üküm mart 21-de seslendirilecektir.
Ukraina halq deputatı ve Avropa Şurası Parlament assambleyasındaki Yuqarı Rada delegatı Nadejda Savçenko Rusiyede 2014 senesi yazda Ukraina akimiyetiniñ iznini almayıp Lugansk civarında bulunğan Rusiye televideniyesiniñ eki jurnalistini öldürilmesi ile qabaatlana. Bundan ğayrı, onı separatistlerni öldürmek niyeti ve Rusiye sıñırını qanunsız alda keçüv ile qabaatlaylar. Rusiye prokurorları ukrain uçucısını 23 yılğa qadar azatlıqtan marum qaldırmağa talap eteler. Savçenko ve adliyecileri bunı red etip, Rusiye jurnalistleri vefat etken vaqıtta onı endi separatistler esir alğanını, soñra ise zorlap Rusiyege yollağanlarını bildireler. Amma mahkeme bu delillerge emiyet bermedi.
