«Qırımnıñ miniatüra parkından Azatlıq Eykelini alıp taşlamağa qarar berdi. Çünki parkımızda bulunuvını itibardan tüşüre, der tüşünemiz», – dep bildirdi parknıñ baş müdiri, Qırımnıñ Rusiye parlamentinde LDPR Rusiye firqasından deputat Viktor Jilenko. Bağçasaray miniatüra parkında kösterilgen videoda Viktor Jilenko Azatlıq Eykeline pomidor suvını töke, bundan evel ise «Amerika putınıñ etraftaki dünyağa kör olğanınıñ» timsali olaraq közlerni qara şeritnen baylay.
«Müim» tedbirde Qırımnıñ Rusiye parlamenti reisi Vladimir Konstantinov da iştirak etti. O, amerikalılar «olarnı cemiyetimiz, bir çoq medeniy memleket ne içün körmege istemegenini» tüşünmeli, dep ayttı.
«Temizlikten» soñ Bağçasaray miniatüra parkı – fotoresimlerimizde.
