"Memorial" Rusiye uquq qorçalayıcı leyhası Rusiye tarafından "casuslıqta" qabaatlanğan qırımlı Leniye Ümerovanı siyasiy mabüs olaraq tanıdı. Bu aqta teşkilâtnıñ beyanatında aytıla.
"Siyasiy mabüslerge qoltutuv. Memorial" uquq qoruyıcı leyhası halqara kriteriylerge esaslanıp, Leniye Ümerovanı siyasiy mabüs dep saya. Onı casuslıq maddesine köre, telefonda arbiy tehnikanıñ fotoları tapılğanı içün taqip eteler. Mahkemeci qabaatlamadan evel, qıznı saçma qabaatlavlar boyunca dört kere memuriy apiske aldılar", — dep aytıla haberde.
Qayd etilgenine köre, Ümerovağa qarşı cinaiy dava cenk vaqtında vatandaş ealisiniñ vaziyeti aqqında halqara qanunlarğa zıt kele, ayrıca adaletli mahkeme aqqını boza ve delillerniñ sahteleştirilmesine esaslana.
"Memorial" Ümerovanıñ azat etilmesini ve cinaiy taqipniñ toqtatılmasını talap etti.
"Biz qanunsız tutulğan diger Ukrayina vatandaşlarınıñ azat etilmesini ve olarğa qarşı esassız davalarnıñ toqtatılmasını talap etemiz", — dep qayd eteler aq qorçalayıcılar.
2022 senesi dekabr ayında 25 yaşındaki Leniye Ümerova Kıyivden Qırımğa barmaq kerek edi, çünki babası onkologiya hastasıdır. Rusiye quvetçileri onı, rejim zonasınıñ qaidelerini bozğanı içün, Gürcistan-Rusiye sıñırından keçken soñ tuttı.
Üç aydan soñ onı yiberdiler, lâkin Leniye, vesiqaları olmağanı içün, politsiya patrulını tuttı, dep tarif etti qıznıñ qardaşı. Neticede Rusiye mahkemesi oña 15 künlik apis cezasını berdi. Bundan soñ qıznıñ daa eki protokolı tizildi.
2023 senesi mayısnıñ 5-nde Moskvanıñ Lefortovo mahkemesi Ümerovanı casuslıqta qabaatlap apiske aldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
