Qırımda Keriç parom keçitiniñ işini toqtattı. Bu aqta Qırımnıñ Rusiye naqliyat naziri Nikolay Lukaşenko öz telegram kanalında bildirdi.
Berilgen malümatqa köre, paromlarnıñ areketi yerli vaqıtnen 11:22-den berli toqtatıldı. Lukaşenko keçiş noqtasınıñ işini toqtatqanınıñ sebepleri aqqında aytmay.
Parom keçitinde areket bazıda ava şaraitleri sebebinden toqtatıla. Qırım sinoptikleri mayısnıñ 4-nde bazı yerlerde yelniñ süratı 20 metrge qadar arta bilecegini bildirgen edi. Amma Qırımdaki Rusiye Fevqulâde vaziyetler nazirliginiñ idaresi furtuna havfını ilân etmedi.
Keriç parom keçiti 2022 senesi oktâbrniñ 8-nde Keriç (Qırım) köpründe yüz bergen yanğın ve patlavdan soñ kene qullanıla.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
